సహజ సాంత్వన ఇచ్చే.. సహజ నూనెలు

 ప్రకృతి నుంచి లభించే రకరకాల మొక్కల బీర్లు వేర్లు గింజలు, కాండం, పువ్వులనుంచి సేకరించిన నూనెలను అరోమా తైలాలు అంటారు. వీటిలోని మేలు చేసే కొన్ని పదార్థాలు ముక్కు నుండి మెదడుకు చేరి రక్త ప్రసరణ, ఆలోచన కేంద్రాలు , ఊపిరి తిత్తుల మీద పని చేస్తాయి. వీటిలో చెప్పుకో దగినవి నీలగిరి , జాజి తైలాలు. వీటి లోని కొన్ని పదార్థాలు వాతావరణం లోని క్రిములను సంహరించడానికి ఉపయోగపడతాయి. 

నీలగిరి తో నొప్పులు దూరం..

కప్పు నీళ్లలో 6 చుక్కల నూనె కలిపి పుక్కిలిస్తే నోటి పూత, ఫంగల్ ఇన్ఫెక్షన్లు బాధించవు. జ్వరంతో బాధ పడేవారికి చల్లటి నీళ్లలో 6 నుంచి 10 చుక్కల నీలగిరి తైలం వేసి ఒంటిని తడిపితే జ్వరం త్వరగా తగ్గుతుంది. 

జలుబు, దగ్గు, సైనస్ వల్ల వచ్చే తలనొప్పి బాధిస్తుంటే చేతి రుమాలులో 4 చుక్కలు వేసి పీల్చితే ఉపశమనం లభిస్తుంది. చిన్న పిల్లలకు కఫం పెరిగి గురక పెడుతుంటే 6 నుంచి 10 చుక్కలు నీళ్లలో వేసి పీల్చేలా చూడాలి. 

ఫ్లూ జ్వరం ఉన్నవారికి నీళ్లలో 2,3 చుక్కలు వేసి తాగిస్తారు. కండరాల నొప్పి, నరం పట్టుకు పోయినపుడు కొబ్బరి నూనె లో కొద్దిగా తైలం కలిపి పై పూతగా రాస్తే సమస్య దూరమై హాయిగా ఉంటుంది. 

నల్లులు,పురుగులను నిర్మూలించాలంటే నీలగిరి తైలాన్ని టర్పంటైన్ తైలంలో కలిపి అందులో చిన్న చిన్న కాటన్ ఉండలు వేసి బయటకు తీసి వాటిని మంచాల మూలల్లో, దుస్తుల అల్మారా లో పెడితే వాటి బెడద తగ్గుతుంది. 

నీలగిరి తైలాన్ని తేనె తో కలిపి మొటిమల మీద రాస్తే అవి త్వరగా మానిపోతాయి. ఐతే 6 ఏళ్ల లోపు చిన్నారులకు నోటి ద్వారా ఇవ్వకూడదు. 

హాయి నిద్రకు జాజి నూనె..

మానసిక ఒత్తిడి,ఆందోళనలో ఉన్నవారు వాడితే మంచి గుణం ఉంటుంది.గుండె పనితీరును పెంచుతుంది. ఒంటి నొప్పులతో బాధ పడేవారు కొబ్బరి నూనె తో కలిపి రాసుకుంటే నొప్పులు తగ్గుతాయి.

బకెట్ నీళ్లలో కొద్దిగా జాజి నూనె ను కలిపి బాలింతలు స్నానం చేస్తే చక్కగా నిద్ర పడుతుంది.మనసుకు హాయిగా ఉంటుంది. ఒత్తిళ్ళు తగ్గుతాయి. అలానే నెలసరి సమయంలో కడుపు నొప్పి అనిపిస్తే పొత్తి కడుపు మీద రాస్తే మంచిది.

తలలో పేలు బాధిస్తుంటే కొబ్బరి నూనె లో జాజి తైలాన్ని కలిపి రాస్తుంటే ఇబ్బంది ఉండదు. చెంచా పాల మీగడలో 4 చుక్కలు  చేర్చి మర్దన చేస్తే ముఖం మీద మచ్చలు తగ్గు ముఖం పడతాయి.

జాజి తైలం..జాగ్రత్తలు..

ఈ తైలాన్ని కొబ్బరి, ఆలివ్ నూనె,తేనె .. ఏదో ఒక దానితో కలిపి కొంచెం వాడితే మంచి ఫలితం ఇస్తుంది. సుగంధ తైలాల వాడకంలో వీటిని ఇతర నూనెలతో కలిపి వాడుకోవాలి. ఇవి ఘాటైన ద్రవ్యాలు కాబట్టి పరిమితంగా వాడాలి. ఉప్పు,నూనె, ఏదైనా పిండిలో కానీ వేసి వాడుకోవాలి. సుమారు 10 నుండి 12 చుక్కలు మించి వాడకూడదు.

చిన్నారులు, వాసన పడని వారు వీటికి దూరంగా ఉండాలి. ఒక్కో సారి ఈ నూనె వల్ల గర్భ స్రావం అయ్యే ఆస్కారం కూడా ఉంటుంది. కాబట్టి గర్భిణులు వాడక పోవడం మేలు. కొందరికి పడక వాంతులు,తలనొప్పి సమస్యలు బాధిస్తాయి . కాబట్టి గమనించి వాడుకోవాలి.